Wed, 23 Oct 2019

Cebuano News: Upat pa ka lungsod ang may konseho batok ASF

Philippine Information Agency
23 Sep 2019, 16:38 GMT+10

TAGBILARAN CITY, Bohol, Sept. 17 (PIA) -- Upat pa ka lungsod sa Bohol ang nakamugna sa ilang kaugalingon nga Municipal African Swine Fever (ASF) Councils o Task Force.

Kini bisan pa sa gipagawas nga memorandum ni Gobernador Arthur Yap ngadto sa mga Hepe Ehekutibo nga nag mandu sa pagtudlo og tawo nga makatabang sa mga technicians sa Office of the Provincial Veterinarian, mga tinugyanan sa quarantine aron magbantay sa mga pantalan ug dungguanan ug magmonitor sa mga ginagmay nga baboyan aron madali ang pag-aksyon kon ugaling may namatikdan nga sakit sa hayop.

Subay sa memorandum sa gobernador, nagpahigayon dayon ang Jagna, ubos ni Mayor Joseph Ranola, Sikatuna, ubos ni Mayor Justiniana Ellorimo, Syudad sa Tagbilaran ubos ni Mayor John Geesnell Yap II ug Trinidad ubos ni Mayor Judith Cajes sa pagtukod sa ilang kaugalingon nga task force o konseho batok sa pagpugong nga makasulod ang ASF, taho ni Provincial Veterinarian Stella Marie Lapiz, didto sa tigum sa ASF Executive Council sa PPDO Conference Hall sa bag-ong Kapitolyo Septembre 17.

HUMAN GIKAKOMPIRMAR SA DA NGA ASF GYUD. Nagkatapok sa dinalian nga tawag ang Bohol ASF Executive Council aron desisyonan ang hugot nga pagpanira sa Bohol aron pugngan ang pagsulod sa konatimnadong karne gikan sa gawas. (rahc/PIA-7/Bohol)

Gipadayag ni Marietta Gasatan, kinsa sakop sa Executive Council ug nagrepresenta sa Bohol Chamber of Commerce and Industry, nga mahinungdanon ang pag-umol sa konseho o task Force batok sa ASF sanglit dili na mahimo pa nga huwaton nga makasulod ang sakit sa baboy dinhi sa Bohol kay mapapas gyud ang gibanabana nga P6 bilyones nga industriya sa baboyan dinhi.

Matud ni Dr. Lapiz, bisan pa kon may mga kalungsuran nga nagtudlo na sa ilang kaugalingon nga Veterinary Quarantine Aides (VQA) nga magbantay aron kapugngan ang pagsulod sa sakit nga grabe ka mananakod, dili mahimo nga sila ang mopatuman sa pagdili sa pagsulod kay wala kini silay gahum.

May gikataho nga 13 ka kalungsuran usab nga mihatag og labing menos usa ka tawo aron mamahimong VQA magbantay sa pagkatap sa ASF.

Kahinumduman nga nagpagawas na og temporary nga pagdili sa pagpasulod sa buhi o karne ug bisan unsa nga matang sa giproseso nga karne sa baboy dinhi sa Bohol, human gikataho sa pagpangamatay sa mga baboy didto sa Luzon.

Apan sanglit dyutay ra ang mga natumbok nga Veterinary Quarantine Officers sa Bohol, ang hangyo sa gobernador sa mga mayor sa kalungsuran, nga magtudlo silag tawo nga mamahimong Veterinary Quarantine Aide.

Kini hinuon sila nga gipangsweldohan sa mga kalungsuran, magamhan lamang kon ang lungsod makahimo sa ASF Task Force aron ang mga mayor na ang mohatag sa gahum sa ilang gitudlo, ubos sa ila usab nga opisyal nga katungod aron makahimo sa personal nga pag-inspeksyon kon may karne ba, o luto nga karne nga gibitbit sa mga pasahero pasulod sa Bohol.

Sa mga gitudlo sa mga mayor nga VQA pun-an sa 20 nga gisweldohan usab sa Kapitolyo alang sa maong susamang buhat, may 33 na ka tawo nga nagtabang karon sa pagsuhid kon may karne ba o luto na nga gipasulod sa Bohol.

Sukad niadtong Agosto 27, may 15 na ka kilo ug lain pang 15 ka pakete nga chicharon, ang nasakmit sa mga tinugyanan nga bitbit sa mga pasahero nga ipasulod na unta sa Bohol.

Gawas niini, lain nga 20 ka kilos nga lechon, 4 ka kilo nga gipakaging nga tinai sa baboy ug usa ka kilo nga chorizo ang nalabug sa mga disposal bins sa airport ug mga pantalan sa Jagna, Tagbilaran, Tubigon ug Ubay, segun pa sa Office of the Provincial veterinarian. (rahc/PIA-7/Bohol)

More Africa News

Access More

Sign up for Sudan News

a daily newsletter full of things to discuss over drinks.and the great thing is that it's on the house!